|
Spaccato tratto dalla Bibbia - voltada in milanes da Oreste Jannelli
Libro III - Levitico
Regol per i sacrifizzi
El sacrifizzi complett
1 - El Signor ciama Mosè da la tenda del Tabernacol de l'inconter, ghe ordina de comunicà ai fioeu d'Israele questi
prescrizion:
"Quand vun de vialter el voeur offrì on animal come sacrifizzi per el Signor, pò scernill tra el bestiamm gròss o
tra quell piccol.
"Se l'offriss, come sacrifizzi complett, on capp de bestiamm gròss, dev toeu on tòr senza difett: le pòrta arent a
l'ingress del Tabernacol, de l'inconter, per ottegnì l'approvazion del Signor; ponda la man in sul coo de l'animal,
e inscì el Signor l'accetta la soa offerta e ghe da el perdon. Poeu scanna l'animal denanz al santuari.
On sacerdòtt, vun di discendent de Arònne, el toeu del sangu de l'animal coppaa e le spantega sora 'i lati de
l'altar che l'è a l'ingress de la tenda de l'inconter. Intanta la ven tòlta la pell al tòr mazzaa, e l'animal el
ven tajaa a tòcch. Sora l'altar i sacerdòtt pizzen on foeugh e ghe gionten sù legna; metten i tòcch de carna sora
la brasa, cont el coo e i part grass. I viscer e i sciamp de l'animal hinn lavaa con acqua, poeu vun di sacerdòtt
el fa brusà tutt sora l'altar. Quest l'è el sacrifizzi complett, che'l Signor accetta volentera.
"Quand vun el voeur offrì, come sacrifizzi complett, on capp de bestiamm piccol, el dev scernì on monton o on capp
senza difett: le scanna in del restà sul lato nòrd de l'altar che l'è l'ingress del santuari. Poeu i sacerdòtt
spanteghen el sangu de l'animal sora i lati de l'altar.
L'animal el ven tajaa a tòcch, e se mett d'on lato el coo e i part grass. Vun di sacerdòtt el toeu allora 'sti
tòcch e ie brusa sora la brasa che l'è in sù l'altar. I viscer e i sciamp de l'animal hinn lavaa con l'acqua,
poeu vun di sacerdòtt el fa brusà tutt sora l'altar. Quest l'è on sacrifizzi complett, che'l Signor accetta volentera!
"Se vun el voeur offrì, come sacrifizzi complett on volatil, el dev scernì ona doldora o on pivion. El sacerdòtt
pòrta l'animal denanz a l'altar, ghe distacca el coo e le brusaa sù l'altar; el fa prima colà el sangu sù i lati de
l'altar. Poeu el toeu via el gòss cont el sò contegnuu e le butta in sul mucc di cener, che'l resta in del lato
est de l'altar. Dòpo d'avè tajaa el volatil in duu tòcch, le toeu per i al, senza spartì i dò metaa, le brusa sù
la brasa infogorenta che l'è sora l'altar. Quest l'è on sacrifizzi complett, on don che'l Signor accetta volentera.
L'offerta di vegetai
2 - "Se vun el voeur portà al Signor on offerta de vegetai, el toeu de la farina e ghe versa sora l'oli e giunta on
poo d'incens. Poeu consegna tutt ai sacerdòtt discendent de Arònne. On sacerdòtt el tojerà allora on pugn de farina
mes'ciada con òli e con incens e le farà brusà sù l'altar come memorial (a ricòrd de l'offerenta). El Signor
l'accetta volentera questa offerta consumada in sò onor. El rest de l'offerta spetta ai sacerdòtt: l'è ona part
santissima, perchè la vegn da on sacrifizzi offert al Signor.
"Se se tratta d'on'offerta còtta al forna, se pò offrii domà carsenza minga levada impastada con òli o schisciad
minga levaa spalmaa de òli.
"Se se tratta d'on'offerta còtta sù ona piastra, dev vess de farina impastada con òli, senza levaa la se dev romp
in tanti tòcch, e sora de questi se versa anmò de l'òli. Questa l'è on'offerta de vegetai.
"Se se tratta d'on'offerta còtta in la pignatta, dev vess fada de farina e d'òli.
"I offert preparaa segond questi regol deven vess portaa al santuari e consegnaa al sacerdòtt, che ie deponn sora
l'altar.
El sacerdòtt ne brusa ona part sù l'altar come memorial. El Signor accetta volentera questa offerta consunada dal
foeugh in sò onor. El rest de l'offerta spetta ai sacerdòtt: l'è ona part santissima, perchè la vegn da on
sacrifizzi offert al Signor.
"nissuna offerta destinada al Signor la dev contegnì levaa: Quand se prepara on'offerta per el Signor, se dev
mai dovrà nè levaa nè mel. Se inveci se offrissen al Signor i primizzi del raccolt, no'l dev mancà nè el levaa
nè l'òli; ma questi prodòtt no pòden vess brusaa sù l'altar: El Signor ie accetta nò.
"Se dev mett del saa sù ògni offerta di vegetai.no desmentegà mai de mett saa sora i offert: l'è on simbol de
l'alleanza de Dio con vu. Per quest in ògni offerta mettarii on poo de saa.
[...]
|
